Орус улутунда болсо да “кыргыз улутчулу” деп куугунтукталган, кыргыз маданияты үчүн опол тоодой кызмат кылган, тилчи, агартуучу, түрколог, профессор Константин Юдахинди ар бир кыргыз жараны билүүсү зарыл.

Константин Кузьмич 1890-жылы 31-майда Падышалык Россиянын Оренбург губерниясынын Орск шаарында туулган. Атасы дыйканчылык менен жан баккан, жашоо шарты оор болгондуктан жакшы жашоо издеп, Олуя-Атага (азыркы Тараз) көчүп келишкен. Константин ошол жерден казак-кыргыз балдары менен чогуу окуп, башталгыч билим алат, андан соң эки жылдык курсту да аяктайт.

Кызыктуу маалыматтар:

• 1906-жылы Ташкен шаарындагы Түркстан мугалимдер семинарийине кирип, аны 1910-жылы аяктайт;

• Азыркы Казакстандын Түркстан чөлкөмү жактагы айылдардын биринди мугалимдик катары өз эмгек жолун баштаган;

• 1915-жылы Россиянын Кашкардагы консулдугуна котормочу катары жиберилген;

• Казакстанда иштеп жүргөн кезинде казак тилин жана говорлорун изилдөөнү колго алат;

• 1925-жылы Орто Азия мамлекеттик университетин аяктаган;

• 1932-1944-жылдарда Москвадагы Чыгыш институтунда уйгур тили кафедрасын жетектеген:

• Юдахин 1929-жылдан тартып 1934-жылга дейре СССР Илимдер академиясынын Чыгыш таануу институтунун Орто Азия бөлүмүн жетектөө милдетин да аркалаган;

• 1949-жылы филология илимдеринин доктору наамын алган;

• 1952-жылы Өзбекстан Илимдер академиясынын кабарчы-мүчөсү болуп шайланган;

• 1954-жылы Кыргызстандын Илимдер академиясынын академиги болуп шайланган;

• Константин Юдахин 1927-жылы өзбек-орус сөздүгүн жарыялаган;

• 1928-жылы уйгур-орус сөздүгүн түзүп, жарыкка чыгарган;

• 1940- жана 1965-жылдары кыргыз-орус сөздүгүн жарыялаган;

• 1944- жана 1959-жылдары орус-кыргыз сөздүгүн жарыялаган;

• Кыргыз сөздүгүн түзүүдө Константин Юдахинге Кусейин Карасай уулу жана Жапар Шүкүров көмөк көрсөтүшкөн.

Белгилүү агартуучу жана тилчи 1975-жылы 22-февралда Фрунзе шаарында каза болгон.